မုသား သက်သေခံခြင်း

အသံ နက်ကြီးနဲ့ ကျုံးအော်ပြီး ၀ုန်းခနဲ ထထိုင်လိုက်တဲ့ သူ့ကြောင့် နှစ်နှစ်ခြိုက်ခြိုက် အိပ်ပျော် နေရာက လန့်နိုးသွားတယ်။

အိပ်ချင်မူးရီ ဖြစ်နေပေမယ့်...

“ကိုဘမောင်၊ ကိုဘမောင်။ ဘာဖြစ်တာလဲ၊ ဘာဖြစ်တာလဲ”

မျက်စိ နှစ်ဖက်လုံး ခွဲထားတာရယ်၊ ညအိပ်မီး မှောင်ရီဝိုးဝါးရယ်၊ ပီပီပြင်ပြင် မမြင်ရပေမယ့် သူ့ကိုယ်လုံးကြီး တဆတ်ဆတ် တုန်နေတာ သိနေတယ်။ အဲဒါနဲ့ပဲ အသာ ထထိုင်ပြီး သူ့နဖူး စမ်းကြည့်လိုက်တော့ အိုး...ချွေးတွေကို နစ်လို့။ အခုတော့ စောစောက အသံနက်ကြီးနဲ့ ကုန်းအော်လိုက်တာ သူမဟုတ်တဲ့ အတိုင်း တုတ်တုတ် မလှုပ်ဘူး။

“အဖျားမရှိပါဘူး။ ဘယ်လို နေလဲဟင်၊ အိပ်မက်ဆိုးတွေ မက်တယ်နဲ့ တူတယ်။ ချွေးတွေလည်း ရွှဲလို့။ ရေလေး သောက်လိုက်ဦး”

ခုတင်ဘေးမှာ ထားတဲ့ ရေတကောင်းလေးကို လှမ်းစမ်းပြီး ရေခွက်ထဲ ငှဲ့ထည့် ပေးလိုက်တော့ ရင်တုန်သွားတာရယ်၊ မျက်စိက သိပ်ကြည့် မကောင်းတာ ရယ်နဲ့ ရေစက်တချို့ ပေါင်ပေါ် ဖိတ်ကျသွားတယ်။ အရေပြားပေါ်က အေးသွားပေမယ့် ရင်ထဲမှာ ပူလာတယ်။ ဘာဖြစ်တာလဲ။ ဘာ ဖြစ်တာလဲ။

“အင်္ကျီ လဲထားလိုက် ဦး။ ကျွန်မ ယူပေးမယ်”

ခုတင်ကို စမ်းပြီး ဆင်း မယ်ပြင်တော့မှ သူက လှမ်းဆွဲထားတယ်။

“နေပါစေကွာ။ ကိုယ့် ဘာသာ ထလဲလိုက်ပါ့မယ်”

သူ ထသွားတော့မှ ခုတင်ပေါ် သာသာကလေး ပြန်လှဲနေလိုက်တယ်။ အင်္ကျီလဲသံ၊ Toilet ၀င်သံ၊ ရေဆွဲ ချသံ၊ လက်ဆေးနေတဲ့ အသံတွေ ဆက်တိုက် ကြားနေရသလို ခဏတိုင်း ထွက်လာတဲ့ သူ့သက်ပြင်း ချသံကိုလည်း ကြားနေရတယ်။

ကိုဘမောင်၊ သူ့မှာ ပြဿနာ တစ်ခုခုတော့ ရှိနေပြီ။ စောစောက အော်လိုက်တဲ့ နာမည် “မာလာ”တဲ့။ သူ ဘယ်သူလဲ။ ဘယ်ကလဲ။ အသက်တွေ ငါးဆယ်စွန်းပြီး အိမ်ထောင်သက် နှစ်ဆယ့်ငါး နှစ်ကျော်မှ ပထမဦးဆုံးကြား ရတဲ့ မသင်္ကာစရာ နာမည်။ မသင်္ကာတာ မဟုတ်ပါဘူး သေချာမှာပါ။ ဘယ့်နှယ် အိပ်နေရာက ဗြုန်းခနဲ လန့်နိုးပြီး ချွေးစေး ချွေးပေါက်တွေ ကျရလောက်အောင် ဖြစ်နေရ တဲ့နာမည်။ ပြဿနာမှ ပြဿနာ၊ တော်တော်ကြီးတဲ့ ပြဿနာမှန်း ရိပ်မိလိုက်ပြီ။ ဘာလုပ်ရမှန်း၊ ဘာဆုံးဖြတ် ရမှန်း မသိအောင် ဖြစ်နေတဲ့ ဆူဝေ လှုပ်ရှားစိတ်တွေကို ဘယ်လိုငြိမ်အောင် ထိန်းရပါ့။ သြော်...ဒုက္ခ၊ ဒုက္ခ အသက်တွေလည်း ကြီးကြ ပေါ့။

ခဏနေတော့ ကိုဘမောင် ခုတင်ပေါ် ပြန်လာထိုင်တယ်။ ငွေ့ခနဲ တိုးသွားတဲ့ လေရှိန်ကြောင့် သာ သူ့အပြုအမူက ညင်သာ နေတယ်။ ငြိမ်ငြိမ်ကလေး ထိုင်နေတာ၊ တရား မှတ်နေတာ များလား။ သူက တရား မှတ်တယ်ဆိုရင် ကျွန်မက ဒုက္ခပေါ့။ သူက ငြိမ်ဆိတ် လေလေ တဒုန်းဒုန်း တိုးနေတဲ့ ကျွန်မ နှလုံးခုန်သံက ပိုကျယ် လာလေ။ ဘုရား၊ ဘုရား ကျွန်မ နှလုံးခုန်သံ သူကြားသွားမှဖြင့်။ အသက် မရှူဝံ့လို့ မျှဉ်းပြီး ရှူနေရတယ်။ သူ ဒီလိုဖြစ်နေတာ ကျွန်မ မသိဘူး။ အလေးမထားဘူး ဆိုတာပြရအောင် အိပ်ချင်ဟန် ဆောင်နေမိတယ်။ ရှက်စရာကြီး၊ သူသိလို့ မဖြစ်ဘူး။ ကျွန်မ ဘာမှမသိဘူး Ok, သူကတော့ ငြိမ်လို့၊ ကျွန်မ ကတော့ ခန္ဓာကိုယ် အသက်ဓာတ် အတွက် အရေးအကြီး ဆုံး လေရှူတာတောင် ခိုး ကြောင်ခိုးဝှက် ရှူနေရပါ လား။ အဲဒီအသိ ၀င်လာတော့ ဆတ်ခနဲ ထထိုင်လိုက်မိတယ်။

“ဟင်... အိပ်မပျော် ဘူးလား။ ဖြည်းဖြည်းထပါ မိန်းမရယ်၊ မျက်စိ ခွဲထားတဲ့ သူက ဖျတ်လတ်ပေါ့ပါး လိုက်တာမှ”

“ကဲ၊ ကိုဘမောင် ရှင့် မှာ ပြဿနာတစ်ခုခုတော့ ရှိနေပြီ”

“အိပ်မက် ယောင်တာပါ မိန်းမရာ။ မင်းကလည်း တွေးလိုက်ရင် တစ်ဆုံးပဲ”

“ဟင်၊ ရှင့်အိပ်မက် ကလည်း အံ့သြစရာ။ ယောင်စရာတွေ အများကြီးထဲက မိန်းမနာမည်မှ ယောင်ရ လား။ ထူးပါပေ့ရှင်”

“ဟ... အိပ်မက်ပါ ဆို မှကွာ။ အဲလိုများ အမိန့်ပေးလို့ ရရင် မင်းနဲ့ငါ ငယ်ဘ၀ လေးတွေချည်း ပြန်မက်ဖို့ အမိန့်ပေးထားလိုက်မယ် ဟား...ဟား...ဟား။

“အိပ်တော့၊ အိပ်တော့။ နေဦး၊ နေဦး ကိုယ်လုပ်ပေး မယ်” လည်ပင်းနောက်လက် လျှိုပြီး မွေ့ရာပေါ် လှဲသိပ်ပေး နေတဲ့ သူ့ကို မော့ကြည့်ရင်း အတိတ်တွေ ခေါင်းထဲ ၀င်လာတယ်။

“ဖြည်းဖြည်း၊ ဖြည်း ဖြည်း။ Ok. မျက်စိခွဲထားတာ တစ်လလောက်ရှိသေးတာ စိတ်လိုက်မာန်ပါ မထပါနဲ့ကွာ”

၂။

ပြီးခဲ့တဲ့ ၂၀၁၀ ဖေ ဖော်ဝါရီမှာ ကျွန်မတို့ အိမ်ထောင်သက် ၂၅ နှစ်ပြည့် တယ်။ အခု ၂၀၁၀ အောက် တိုဘာဆိုတော့ ၂၅ နှစ်နဲ့ ၈ လပေါ့။ ကျွန်မတို့ အိမ်ထောင် ရေးမှာ ကျွန်မက ပါရမီဖြည့် ရုံသက်သက် အိမ်တွင်းမှုလုပ် သိမ်းထုပ်သေချာလို့ ဆုံးမခဲ့တဲ့ အဘိုးအဘွားတွေနဲ့ ကြီး ပြင်းခဲ့သူ ဆိုတော့ အိမ်မှုကိစ္စ လုပ်ရတာ ကျွန်မ စိတ်အ၀င်စားဆုံး ဘာသာရပ်ပေါ့။

အဲဒီလိုနဲ့ သူနဲ့သား နှစ်ယောက်ကို သားကိုသခင်၊ လင်ကို ဘုရားဆိုတဲ့ စကား လေးအတိုင်း ပြုစုစောင့် ရှောက်လာခဲ့တာ အပြင် လောကနဲ့ ဝေးမှန်းမသိ ဝေးလာခဲ့ တော့တာပဲ။ ကျွန်မကိုယ်၌က အပြင်ထွက်ဖို့ စိတ်မ၀င်စားတဲ့သူ ဆိုတော့ ဈေးသွားတာ၊ ဘုရားသွားတာလောက်ပဲ တကူးတက ထွက်ဖြစ်တော့ တာ။ ကျွန်မရဲ့အိမ်မှာ ကျွန်မ လက်ရာ တက်တင်း အနား သတ်ထားတဲ့ ခန်းဆီးလေး တွေ တလွင့်လွင့် ၀ဲနေမယ်၊ နှင်းဆီပန်းရောင်စုံ ထိုးထားတဲ့ ပန်းအိုးတွေ ဘုရားစင်တင် မကဘူး စားပွဲတိုင်းမှာ ရှိနေမယ်၊ ပါကေး ကြမ်းပြင်တွေက နင်းရက်စရာ မရှိအောင် တောက်ပြောင်နေမယ်၊ အိမ်ဝိုင်းထဲမှာ နှင်းဆီပင်၊ သစ်ခွ ပင်၊ ဂမုန်းပင်တွေတင်မကဘူး မီးဖိုချောင်သုံး သီးနှံတွေက ခြံပြည့် ၀င်းပြည့်။

အချိန်ရတာနဲ့ သစ်ခွပင်တွေကြား၊ နှင်းဆီပင်တွေ ကြား ပေါင်းနုတ်မယ်၊ ဆေးဖျန်းမယ်။ ကျွန်မမှာ နားချိန် မရှိဘူး။ အချိန်ကလေး ရတာနဲ့ ခြံထဲ ဆင်းတော့တာပဲ။ စာဖတ်တာ၊ တီဗွီကြည့်တာ မလုပ်ဖြစ်သလောက်။ ကိုဘမောင် သတင်း နားထောင်ချိန်လောက်သာ သစ်သီးလေးတွေ ခွဲ၊ စိတ်၊ နွှာ၊ သင် ကျွေးရင်း စကားပြော ရင်း တီဗွီရှေ့ ခဏ ထိုင်ဖြစ် တာလေ။

တစ်သက်လုံး စိတ်ချမ်း သာချင်ရင် သစ်ပင်စိုက်ဆိုတဲ့ စကားလိုပဲ သစ်ပင်တွေ ပျိုးထောင်တယ်။ မိသားစုကို ပျိုးထောင်တယ်။ အခုအချိန် မှာ ပြန်တွေးကြည့်တော့ အိမ် တွင်းမှာ မေတ္တာခြုံလို့နွေးခဲ့ သမျှ အိမ်ပြင်ထိ မေတ္တာစက် မဖြန့်နိုင်တော့ဘူးလား။

မာလာ။

သူ ဘယ်သူလဲ။ ကျွန်မ စိတ်ထင်တာမဟုတ်ဘူး။ ဟို တစ်ညက စပြီး ကိုဘမောင် အချိုးတွေ ပြောင်းလာတာပဲ။ သိသိသာသာ ငိုင်တွေပြီး စိုက်စိုက်ကြီး ကြည့်နေရင် ဘာကိုမှ မမြင်ရတော့တဲ့ အတိုင်း။ ကျွန်မလည်း သာသာကလေး ကိုယ်ရှိန် သတ်ပြီး အကဲခတ် နေရတယ်။ ညညဆိုရင်လည်း မအိပ်ဘူး။ သူ့ကို အကဲခတ်ရင်း ကျွန်မကပဲ အိပ်ပျော် သွားတာ။ ကျွန်မ တစ်ရေးနိုး တိုင်း သက်ပြင်းတချချနဲ့ နိုးနေတတ်တာ။ နောက်တစ်ခု ထူးတာက အိမ်ကပ်နေတာ။ အရင်လို Golf ရိုက်လည်း မသွားဘူး။ ဆိုင်လည်း မထိုင်ဘူး။ ပွဲရုံလည်း ပုံမှန်မသွား ဘူး။ မန်နေဂျာနဲ့ လွှဲထား တယ်နဲ့တူပါရဲ့။ ဖုန်းနဲ့ ပြော သံဆိုသံတွေ ကြားနေပေမယ့် ဘယ်တုန်းကမှ ၀င်မစွက်ဖက် ခဲ့တော့ အခုမှ ထမေးမနေ ချင်ဘူး။ သူ ဘာဖြစ်နေမှန်း မသိရပေမယ့် ကျွန်မရင်ထဲမှာ ရွာတော့မယ့် မိုးလို အုံ့မှိုင်း နေတယ်။ ဘာမှန်း မသိရ တာက တစ်မျိုး၊ အိမ်ရှေ့ပူ တော့ အိမ်နောက် မချမ်းသာ ဖြစ်ရတာက တစ်မျိုး ရူးချင် တာပဲ။ ကျန်တဲ့အချိန်တွေမှာ အိမ်မှုကိစ္စလိုလို၊ သစ်ပင်တွေ လိုလို ရှောင်လွှဲလို့ရပေမယ့် သတင်းနားထောင်တဲ့ အချိန် ဆိုရင် ရှောင်လွှဲလို့ မရတော့ဘူး။ နှစ် ၂၀ ကျော်ပြုခဲ့တဲ့ ဓလေ့ဆိုတော့ အခုမှ ကောက် ကာငင်ကာ ရှောင်ထွက်နေရင် သူသိသွားတော့မယ်။ နဂါးမောက်သီးစိတ်ကလေး တွေ ထည့်ထားတဲ့ ပန်းကန် ကိုင်ပြီး ငိုင်နေရင်း ဘာပြော ရမှန်းမသိဘူး။

အရင်ကတော့ ဒီအချိန်က ကျွန်မတို့ လင်မယားရဲ့ ကိုယ်ပိုင်အချိန်၊ သူပြောချင်တာ ကျွန်မပြော ချင်တာ ဖလှယ်ကြတဲ့အချိန်၊ သားတွေ အကြောင်း ဆွေးနွေးတဲ့ အချိန်၊ သူကြားလာတဲ့ မိတ်ဆွေတွေရဲ့ သတင်း ပြန် ပြောပြတဲ့အချိန်၊ သာရေး၊ နာ ရေး တိုင်ပင်တဲ့ အချိန်၊ သတင်း နားထောင်လိုက်၊ အသီးအနှံ အထူးသဖြင့်တော့ ကျန်းမာရေးအတွက် ကောင်း တယ်ဆိုတဲ့ နဂါးမောက်သီး စားလိုက်၊ စကားလေး ရောက်တတ်ရာရာ ပြောလိုက်ပေါ့။ သတင်းပြီးမှ သူက သူ့လုပ် ငန်း စာရင်း ဇယားတွေနဲ့ အလုပ်ရှုပ်၊ ကျွန်မကလည်း ပန်းပင်တွေဆီ တစ်ကျော့ပြန်၊ ဟောနှစ်နှစ်ဆယ်ကျော် ကျင့်သုံးခဲ့တဲ့ အဲဒီ အစီအစဉ် ကမောက်ကမ ဖြစ်ကုန်ပြီ။

နှစ်ဆယ့်ငါးနှစ်ကျော် ပေါင်းလာခဲ့တဲ့ ယောက်ျား၊ သူ့အကြောင်း ကျွန်မ ကောင်းကောင်းသိခဲ့ပါတယ်။ သားနှစ်ယောက်နဲ့ မိန်းမကို ကမ္ဘာထင်ပြီး အလုပ်ကိုပဲ ကြိုးစားပမ်းစား လုပ်တတ်တဲ့ သူ။ သံသယ မြူတစ်မှုန် မထင်ရက်နိုင်အောင် သစ္စာ ရှိခဲ့တဲ့သူ။

အခု သူ့အကြောင်းမသိ တော့ဘူး။ ဒါပေမဲ့ သားနှစ်ယောက် မျက်နှာ။ ငွေရတု ကျော်နေတဲ့ အိမ်ထောင်သက်ရဲ့ မျက်နှာ၊ ထားခဲ့ဖူးတဲ့ သစ္စာ တရား။ ဒါတွေကို ထောက်ထား ငဲ့ညှာတဲ့ အနေနဲ့ ပြဿနာ အစကို ကျွန်မလက်နဲ့ ဆွဲမ ထုတ်ဖို့ ဆုံးဖြတ် ထားခဲ့တယ်။ သူ ဖွင့်ဟ ၀န်ခံလာမယ့် အချိန်ကို ရင်တ ထိတ်ထိတ်နဲ့ စောင့်ရုံပေါ့။

၃။

ဆိုင်းမဆင့် ဗုံမဆင့်လို့ ပြောရတော့မှာပဲ။ မြစ်ကြီးနားက လမ်းအထူး အဖွဲ့မှာ တာဝန်ကျနေတဲ့ သားကြီး ရုတ်တရက် အိမ်ပြန် ရောက်လာတော့ ခွဲနေရတဲ့ သားကို တွေ့ရလို့ ၀မ်းသာတာထက် အံ့သြတာက ပိုတယ်။ အခုတစ် လော ဘာတွေ ဖြစ်နေပါလိမ့် လို့ တွေးနေတုန်း...

“မေမေ၊ ဖေဖေကော”

“မင်းအဖေ ပွဲရုံသွားတယ်။ ကိုလှအောင် ဖုန်း ဆက်လို့လေ”

“ဟုတ်လို့လား မေမေ။ သားကို မညာနဲ့”

“ဟောတော်၊ လာပြန်ပြီ တစ်ယောက်၊ ဖအေတစ်မျိုး၊ သားကတစ်မျိုး၊ မေမေတော့ ရူးချင်ပြီ”

“ဖေဖေ ဘာဖြစ်နေလဲ။ သားကို ပွင့်ပွင့်လင်းလင်း ပြောပါ။ အခုလည်း ချက်ချင်း ပြန်ခဲ့လို့ ဦးလှအောင်က ဖုန်းဆက်လို့ ပြန်လာတာ”

“ဟင်၊ မေမေလည်း မသိရပါလား”

“ဦးလှအောင်က သားကြီး မင်းအမြန် ပြန်လာမှ ဖြစ်မှာ၊ ဘာမှ မမေးနဲ့ အားလုံး နေကောင်းတယ်။ ညီလေး ကိုလည်း ခေါ်ထားပြီးပြီဆိုလို့”

“ဘုရားရေ၊ ဘုရား... ဘုရား။ ဒုက္ခတော့ ရောက်နေပြီနဲ့ တူပါရဲ့။ ကိုဘမောင် ဘာတွေ လျှောက်လုပ်နေသလဲ။ သားကြီးကိုခေါ်တာ ထားပါတော့ မြန်မာပြည်ထဲတင်”

“ဟာ မေမေကလည်း မြန်မာပြည်ထဲ ဆိုပေမယ့် သားက စက်ကြီး အဖွဲ့နဲ့ တောထဲမှာ နေရတာ၊ စက်ကြီးတွေ ရော ဆီရော တွဲကိုင်နေရတာ။ဦးလှအောင် ဖုန်းကို ရုံးက စက်နဲ့ပေါက်ပေးလို့ ဘာမသိ ညာမသိ ပြေးလာရတာ။ ဟို မှာ သူများနဲ့လွှဲခဲ့ရတာ မေမေရ၊ ပြဿနာဖြစ်ရင် သား ခေါင်းပေါ်ပဲ ကျမှာ။ ကဲပါ မေမေရယ်၊ အဲဒါက အရေး မကြီးဘူး။ ဖေဖေ ဘာဖြစ် လဲပဲ ပြောပါဦး”

“သူ မူပျက်နေတာ တော့ အမှန်ပဲ။ ဒါပေမဲ့ ဘာမှန်း မေမေလည်း မသိဘူး”

“မိန်းမကိစ္စလား”

ကိုဘမောင်အကြောင်း ဖွင့်မပြောသင့်တဲ့ အထဲမှာ သားတို့က အဓိကပေါ့။ ဖအေကို အကြည်ညိုမဲ့စေ မယ့် စကားမျိုး ကျွန်မ ပြော မထွက်ဘူး။

“မဟုတ်နိုင်ပါဘူး သား ရယ်။ သူ့ဘာသာသူ ကျောင်းတက်နေတဲ့ ကလေးကိုပါ ပြန်ခေါ်တယ်ဆိုတော့”

“ဦးလှအောင်က သားကို အလုပ်က အပြီးထွက်စာ တင်ခိုင်းတာ မေမေရဲ့။ စက် ထဲမှာပြောတာ နားမရှင်းလို့ မြစ်ကြီးနားရောက်မှ ဦးလှ အောင်ကို ဖုန်းဆက်လိုက်တာ။ မေမေ့ဆီ ဖုန်းဆက် မနေနဲ့ တွေ့ရတော့မှာပဲကွာ ဆိုတော့ သားက မေမေ တစ်ခုခုဖြစ်ပြီလို့ ထင်တာ။ ဟေ့ကောင် တောင်တွေး၊ မြောက်တွေး တွေးမနေနဲ့၊ မင်းအဖေရော၊ မင်းအမေ ရော ဘာမှမဖြစ်ဘူးတဲ့။ မင်း အဖေက ပြောခိုင်းတာတဲ့။ လေယာဉ်ချိန်လည်း နီးနေတာနဲ့ ဖေဖေနဲ့ မေမေ့ဆီ ဖုန်း မဆက်တော့တာ”

“အေးပါ သားရယ်။ သား ဖေဖေ ပြန်လာရင် ရှင်း သွားမှာပါ။ အခု ခဏ နား လိုက်ဦး”

တစ်သက်လုံး အိမ်တွင်းမှုလုပ် သိမ်းထုပ်သေ ချာဆိုတဲ့ စကားကို လက်ကိုင် ထားခဲ့တဲ့ ကျွန်မ အခု ပထမ ဦးဆုံးအကြိမ်အဖြစ် ကိုယ့် ကိုယ်ကိုယ် အမြင်ကတ်သွား မိတယ်။ နိုင်ငံတကာက မိန်းမတွေ အာကာသထဲသွား ဖို့ ကြိုးစားတဲ့ကိစ္စတွေက ကျွန်မအတွက် မိသားစုနဲ့ ပန်းပင်တွေလောက် အရေး မကြီးခဲ့မိဘူး။ ကဲ...အခု ဘာဆက်လုပ်မလဲ။ အညာနဲ့ ချိတ်ဆက်ပြီး ပဲမျိုးစုံရောင်းတဲ့ ပွဲရုံကို ကိစ္စရှိမှ သွားတာ။ ဘုရင့်နောင်ရဲ့ ကားနံ့၊ လူနံ့၊ အမှုန်အမွှားတွေ ပြည့်နေတဲ့ လေနံ့၊ ဒါတွေ မခံနိုင်လို့လေ။ ပင်စည်က အစို့လေးထွက် လာ၊ တဖြည်းဖြည်း ရှည်ထွက် လာရာက ပန်းငုံကလေး။ အရိပ်တကြည့်ကြည့်နဲ့ ကြည့် မ၀ ရှုမ၀ခင်မှာဘဲ ပန်းပွင့် လေး ဖြစ်သွား၊ တောက်ပတဲ့ အရောင်မျိုးစုံ၊ ဒါတွေနဲ့ အချိန် ကုန်နေခဲ့တာ။

အခု ကျွန်မ ဘာလုပ် ရမှန်း မသိတော့ဘူး။ ခု သားကြီးပြောပုံ အရဆိုရင် သားငယ်လေးပါ ပြန်လာ တော့မယ်။ ကျွန်မ ဘာလုပ် ရမလဲ။ ငြိမ်းချမ်း အေးမြတဲ့ ကျွန်မတို့ မိသားစုလေး ပျက်စီးရတော့မှာလား။ ပြိုကွဲ ရတော့မှာလား။ မာလာ၊ မာလာ၊ သူ ဘယ်သူလဲ။ ကျွန်မကကော ဒီလိုပဲ ငြိမ်ခံ နေတော့မလား။ သားတွေအတွက်၊ ဟုတ် တယ်။ ကျွန်မသားတွေ အတွက် ကျွန်မ တစ်ခုခုတော့ လှုပ်ရှားသင့်ပြီ။

“မောင်ကျော်ရေ၊ မောင် ကျော် ကားအဆင်သင့်ထုတ် ထား၊ ၁၀ မိနစ်နေရင် အန်တီ ထွက်ခဲ့မယ်”

ကျွန်မ လှုပ်ရှားမှ ဖြစ်တော့မယ်။ အင်္ကျီ၊ ထဘီ ကမန်းကတန်း လဲပြီး ဘုရင့် နောင်ပွဲရုံကို ထွက်လာခဲ့ တယ်။ ဘုရင့်နောင်ကတော့ ထုံးစံအတိုင်း ကားတွေ ကျပ်နေတာပါပဲ။ ကြက်သွန်နံ့၊ ငရုတ်သီးနံ့၊ ငါးခြောက်နံ့တွေ လှိုင်နေတဲ့ ပွဲရုံဝင်းထဲ ၀င်လာ ပြီး ပွဲရုံရှေ့မှာ ကားရပ်လိုက် တာနဲ့ ဦးလှအောင် ပြေးထွက် လာတယ်။

“လာ အစ်မ လာ”

“ကိုဘမောင်ကော”

“ဆရာ မရှိဘူး အစ်မ။ ဘဏ်သွားတယ်။ ကျွန်တော် ဘာလုပ်ပေးရမလဲ”

“ရတယ်။ ရတယ်။ ထိုင်စောင့်လိုက်မယ်”

ပြောပြောဆိုဆို ကိုဘ မောင်ရဲ့ အခန်းထဲ ၀င်ထိုင် လိုက်တယ်။ မှန်အလုံပိတ်ပြီး Ari Con လွှတ်ထားတဲ့အခန်း က အပြင်ထက်တော့ နေသာ ထိုင်သာ ရှိတာအမှန်ပဲ။ အရင်တုန်းက စာရွက် စာတမ်းတွေနဲ့ ရှုပ်ပွနေတဲ့ စားပွဲပေါ်မှာ စာအုပ်တွေကို စီစီရီရီ ထပ်ထားတယ်။ စားပွဲ အလယ်မှာ စာချုပ်တစ်စောင်၊ ဘာရယ်မဟုတ် ဆွဲယူကြည့် လိုက်တော့ “ပွဲရုံအရောင်း အ၀ယ်စာချုပ်”တဲ့။ ရောင်းတဲ့ သူက ဦးဘမောင်။

ဘုရားရေ၊ ဒါတော့ တစ်ဆိတ် လွန်လွန်းနေပြီ။ သားတွေ ပြန်ခေါ်ရုံတင် မကဘူး။ ပွဲရုံပါ ရောင်းဖို့ စီစဉ်နေတာ။ ဒီလိုဖြစ်တဲ့ပြဿနာကို မိန်းမကို တစ်ချက် မတိုင်ပင်ဘူး။ ဘယ်တုန်းကမှ မမှားခဲ့ တဲ့သူက မှားမယ့် မှားတော့ ကမ်းကုန်ပါပဲလား။

“အစ်မ၊ ဆရာက လေယာဉ်ကွင်း တန်းသွားမှာတဲ့။ သားငယ်လေးကို ကြိုပြီး အိမ် တန်းပြန်ခဲ့မယ်၊ အစ်မ အိမ်က ပဲ ပြန်စောင့်ပါတဲ့”

“နေစမ်းပါဦး ကိုလှ အောင်၊ ရှင့်ဆရာ ဘာဖြစ်နေတာလဲ”

“ကျွန်တော်လည်း မသိဘူး အစ်မ။ ဆရာက ပြောတယ်။ အချိန် မရှိတော့ဘူး၊ တို့မိသားစု စုစုစည်းစည်း နေရတော့မယ်တဲ့။ သားတွေ ပြန်ခေါ်ရမယ်။ ငွေလည်း ရှာစရာ မလိုတော့ဘူး။ မိသားစု အတူတူ နေရဖို့ပဲ အရေးကြီးတယ်တဲ့”

“ဘာတွေလဲ။ သူ့မှာ ရောဂါရှိလို့လား။ မဖြစ်နိုင် ဘူး။ အမြဲတမ်း Medicial Check-up လုပ်နေကျ။ အားလုံး ရှင်းနေတာ။ နေစမ်းပါဦး၊ မာလာဆိုတာ ဘယ်သူလဲ။ ရှင်သိတယ် မဟုတ်လား”

“ဟာ...မာလာလား၊ မာယာလားတော့ မသိဘူး။ ဆရာ ခဏ ခဏတော့ ရွတ်နေတာပဲ”

“အဲဒါများကွာ။ ငါ့ကို ဘာလို့ မပြောတာလဲ”

“မဟုတ်ဘူး အစ်မ။ အဲဒီ နာမည်ရွတ်ပြီးကတည်း က ဆရာ ငြိမ်နေတာ ဘယ်မှလည်း မသွားတော့ဘူး။ ကျွန်တော့်ကိုပဲ လွှတ်တာ”

“အဲဒီဟာမက အကျပ် ကိုင်လို့နေမှာ။ ဘယ်မှာငြိ လာသလဲ မသိဘူး။ Golf ကွင်းလား၊ စားသောက်ဆိုင် လား။ တစ်ခုခုပဲ။ အေးကွာ အေးအေး အိမ်ကပဲ ပြန်စောင့် တော့မယ်”

အိမ်ပြန်ရောက်တော့ သားကြီးနဲ့လည်း စကား မပြောမိဘူး။ သားအမိနှစ် ယောက် ဧည့်ခန်းမှာ ထိုင်ပြီး သားငယ်လေးနဲ့ သူ့အဖေကို စောင့်နေမိတယ်။ ခြံထဲ ကားဝင်လာသံကြားတယ်။ ကားတံခါးပိတ်သံ၊ အိမ်ထဲ ၀င်လာသံ။ ကျွန်မထိုင်ရာ မထမိဘူး။

“မေမေ”

ကျွန်မရှေ့မှာ ရပ်လာတဲ့ သားငယ်လေးကို ကြည့်ပြီး တင်းထားသမျှ စိတ်ကို လျှော့ချလိုက်တော့ မျက်ရည် တွေ တားမနိုင်ဆီးမရ ကျလာတယ်။

“အားလုံးစိတ်ထဲမှာ သို့ လော...သို့လော ဖြစ်နေ မယ်ဆိုတာ ဖေဖေ သိပါတယ်။ ဒီညတော့ ဖေဖေ့ကို ခွင့်ပြုပါ နှစ်လနီးပါး ခံစား ခဲ့ရတာတွေ၊ အိပ်ရေး ပျက်ခဲ့တာတွေ၊ အခုပဲ ကားထဲမှာ အိပ်ဆေး သောက်ထားတယ်။ မနက်မှ ဖေဖေတို့မိသားစု စကားပြောကြတာပေါ့၊ ဂွတ် နိုက်နော်”

အစောင့်ကြီး စောင့်လာ ခဲ့ပြီးမှ တစ်ညဆိုတော့ မကြာ တော့ပါဘူး။ သားအမိ ၃ ယောက်၊ တစ်ယောက် မျက်နှာ တစ်ယောက် ကြည့်နေမိတယ်။ ခဏနေတော့ သားကြီးက သားငယ်ကို ပခုံးဖက်ပြီး ခေါ်သွားတယ်။ ညက မှောင်လာတော့ မယ်လေ။

၎။

ခြေထောက်ကို အတင်း ဆွဲပြီး လှုပ်နှိုးတာနဲ့ အလန့် တကြားပဲ ထထိုင်မိတယ်။ ရယ်ချင်ပက်ကျိမျက်နှာနဲ့ သားနှစ်ယောက်။ သားငယ် လေးက နှုတ်ခမ်းပေါ် လက် ညှိုးလေး ကန့်လန့်ဖြတ် ထောင်ပြီး သူ့အဖေကို လက် ညိုးထိုးပြတယ်။ သူ့အဖေက အိပ်ဆေးအရှိန်နဲ့ တဟော ဟော ဟောက်သံပေးပြီး အိပ် နေလိုက်တာ။ အတင်းပဲ လက်ဆွဲပြီး ဧည့်ခန်းထဲ ခေါ် လာတယ်။ ဧည့်ခန်းထဲမှာ လည်း ထိုင်မိရော...

“မေမေ၊ မာယာကို သိ လား”

“အမလေးတော်၊ သားတို့ သိနေပြီပေါ့”

“သားက မြစ်ကြီးနားမှာ ကတည်းက ဦးလှအောင်ကို မေးပြီးသား၊ ဦး မပြောရင် ကျွန်တော် ပြန်မလာဘူး တင်းလိုက်တော့မှ ပြောတာ။ မေမေ စိတ်ဆင်းရဲမှာ စိုးလို့ မပြောတာလေ။ မနေ့ညက အထိ သေသေချာချာ မသိ သေးပါဘူး။ ညီလေး ပြန်လာ တော့မှ အကုန်ပြောပြပြီး တိုင် ပင်လိုက်တော့ အဖြေထွက်တာ။ လာ လာ မေမေ့ကို ပြ မယ်”

“ဘာလဲ ဘာလဲ”

“မေမေ့ကို မာယာ ပြမလို့လေ”

သားနှစ်ယောက်က တဟားဟား ရယ်ရင်း ကျွန်မ လက်ကို တစ်ယောက် တစ်ဖက်တွဲပြီး သူ့အဖေ စာကြည့် ခန်းထဲ ဆွဲခေါ်သွားတယ်။

“ညီလေး...မင်း လုပ် ပြလိုက်”

“သားတို့ မနေ့ညက စဉ်းစားကြတာလေ။ ဘာပဲ ဖြစ်ဖြစ် ဖေဖေ့လက်ပ်တော့ ထဲမှာ ရှိမှာပဲဆိုပြီး ကွန်ပျူတာကို မွှေလိုက်တာ တွေ့ပါ လေရော၊ ဒီမှာ မေမေရေ... ဒီမှာ”

သားငယ်လေးပြတဲ့ ခေါင်းစီးကို ကြည့်လိုက် တော့...

“ကမ္ဘာပျက်ခြင်း”

နောက်တစ်ခုက...

“၂၀၁၂ သည် ကမ္ဘာ၏ နောက်ဆုံးနှစ်ပေလော”

နောက်တစ်ခါ...

“သိပ္ပံပညာရှင်များက ဟောကိန်း ထုတ်လိုက်ပြီ”

မြားကလေးကို ထပ် ရွှေ့လိုက်တော့...

“မာယာလူမျိုးတို့၏ ပြက္ခဒိန်သည် အမှန်တကယ် လေလော”

မြားလေးတစ်ရွှေ့...

“နာဆာက စစ်ဆေးနေ ပြီ”

မြားလေးတစ်ရွှေ့...

“သက်ဆိုင်ရာ ဘာသာ ရပ်အလိုက် ကုသိုလ် ကောင်းမှုများ ပြုရန် လိုအပ်”

နောက်ထပ် တစ်ရွှေ့...

ငါ ဘာလုပ်ရမလဲဆိုတဲ့ စာသားတွေ အပြည့်။

သားငယ်လေးက ခလုတ်ကို တဖျပ်ဖျပ် ရိုက်တော့ အဲဒီစာသားတွေချည်းပဲ ဆက်တိုက်ပေါ်လာတာ စာလုံးကြီးလိုက်၊ သေးလိုက်၊ အရောင်တွေနဲ့ ရိုက်လိုက်၊ အဖြူမည်း ရိုက်လိုက်၊ ကျွန်မ နည်းနည်းတော့ သဘော ပေါက်လာသလိုပဲ။ ဒါပေမဲ့ မရှင်းသေးဘူး။

“ဒီလိုလေ မေမေ၊ မနေ့ ညက ကိုကိုက မိန်းမကိစ္စ ထင်တယ်ကွ၊ မာလာဆိုလား၊ မာယာဆိုလား မသိဘူးလို့ ပြောလိုက်တာနဲ့ သားက ဖေဖေ့လက်ပ်တော့ကို ဖွင့် ကြည့်ဖို့ ဆုံးဖြတ်လိုက်တာ။

“အခု အင်တာနက်မှာ ဒီကိစ္စချည်းပဲ ဟော့နေတာလေ။ သားတို့သူငယ်ချင်း တွေလည်း ဒီကိစ္စပဲ ပြောနေ ကြတာ။ မလေးက တရုတ် ကလေးဆို သူ့အိမ်ပြန်မယ် ချည်းပဲ ပြောပြောပြီး ငိုနေ တာ။ သားက ဖေဖေ ပြန် ခေါ်တာ ဒီကိစ္စလို့ မထင်ဘူး။ ဖေဖေကတော့ တကယ့်စံပါ ပဲ မေမေရာ...”

“မာယာဆိုတာ ဘာ တုံး”

“မာယာဆိုတာ ရှေးခေတ်က လူမျိုးစုကြီးပေါ့ မေမေရာ...။ သူတို့ လူမျိုးတွေမှာ ပြက္ခဒိန်ရှိတယ်။ အင်မတန် အဆင့်မြင့်တဲ့ လူ မျိုးစုကြီးပေါ့။ အဲဒီလူမျိုးစု ကြီးရဲ့ ပြက္ခဒိန်က ၂၀၁၂ မှာ ရပ်သွားတယ်။ အဲဒီတော့ အဲဒီနေ့က ကမ္ဘာပျက်မှာမို့လို့ ပြက္ခဒိန် ရပ်သွားတာပေါ့လေ။ အဲဒီကိစ္စတွေ စွပ်စွဲလိုက်ကြ၊ ဖြေရှင်းလိုက်ကြနဲ့ ရှုပ်ယှက်ကို ခတ်နေတာပဲ”

ချွေးသီးချွေးပေါက်တွေ စိုရွှဲပြီး အသံနက်ကြီးနဲ့ ယောင်အော်တဲ့ညကို အမှတ် ရမိတယ်။ မပီမသဆိုတော့ “မာလာ”လို့အော်တယ်ပဲ ထင်မိတာ။

“သားကတော့ တောထဲ မှာ နှစ်ချီပြီးနေရတော့ ဘာမှကို မသိဘူး။ ညီလေးတွေ့ချင်ရင်တောင် ဆိုင်က ကောင် လေးတွေ လုပ်ခိုင်းရတာ။ ကွန်ပျူတာလည်း မကိုင် တတ်ဘူး။ တော်သေးတာ ပေါ့၊ ညီလေး လာပေလို့”

အပြင်မှာ မိုးလင်းစ ပြု ပြီ။

“အဲဒါ တကယ်လား၊ အခု ၂၀၁၀။ ၂၀၁၂ ဆိုတော့ အမလေး မလိုတော့ပါလား နောက်တစ်နှစ်ပေါ့”

“ဟုတ်တယ်၊ မဟုတ် ဘူး ငြင်းနေကြတာ ကမ္ဘာ အနှံ့ပဲ မေမေရဲ့။ ဟောလီဝုဒ် ကဆို ရုပ်ရှင်ကို ရိုက်ပြတာ၊ ကြောက်စရာကြီးပါ မေမေ ရယ်။ သားတို့သူငယ်ချင်း တွေဆို ငိုတဲ့သူတွေ အများ ကြီး။ သားတို့ ဆရာက တွေ့ သွားတော့ မင်းတို့ သိထား ဖို့က သက်သေပြချက် မခိုင် လုံတဲ့ ဘယ်အရာမဆို တွေး ကြောက်နေရုံနဲ့ မရဘူးတဲ့။ သေခြင်းဆိုတာ ကိုယ့်လက် တစ်ကမ်းမှာပဲ ရှိတာ။ ကမ္ဘာ မပျက်ခင်မှာလည်း သေချင် သေသွားနိုင်တာပဲတဲ့။ တကယ် ဟုတ် မဟုတ် မသိ ရတဲ့ကိစ္စတစ်ခုကို တွေးပြီး ကြောက်တယ်၊ တုံ့ပြန်တယ် ဆိုတာ မိုက်တာပဲတဲ့။

သူတို့ တိုင်းပြည်မှာဆို စစ်ပွဲတွေ အမြဲ ဖြစ်နေတာ။ အဲဒါ သူတို့ တိုင်းပြည်အတွက်တော့ ကမ္ဘာပျက်နေတာပဲ မဟုတ် လားတဲ့။ ပြောနေရင်းနဲ့ သား ကို လက်ညှိုးထိုးပြပြီး မင်း တဲ့ မင်းတို့တိုင်းပြည်မှာကော နာဂစ်မုန်တိုင်း တိုက်တယ်။ မုန်တိုင်းသင့် ဒေသလူတွေ အတွက်တော့ ကမ္ဘာပျက်တာ ပဲ မဟုတ်လားတဲ့။ တို့အီရတ် နိုင်ငံဆိုတာ စစ်ဖြစ်တယ်။ ကြိုသိထားပေမယ့် ဘယ်က ပေါ်လာမှန်း မသိတဲ့ မောင်း သူမပါတဲ့ ဗုံးကြဲလေယာဉ် တွေက ဗုံးကြဲချင်တဲ့ဆီ ကြဲ ချသွားတာ။ စာသင်ကျောင်း တွေတောင် မလွတ်ဘူး။ ကဲ အဲဒီလူတွေအတွက် ကမ္ဘာ ပျက်တာပဲ မဟုတ်လား။ အဲဒီတော့ကွာ ယူဆချက် တစ်ခုကို စုံကိုင်ပြီး ငြင်းကြ၊ ဖြေရှင်းကြတာ သုတေသန သမားတွေနဲ့ တာဝန် ရှိသူတွေရဲ့အလုပ်လို့ ခံယူလိုက်ပါ။ မင်းတို့အလုပ်က စာသင်ရ မယ့်အလုပ်။ အဲဒီတော့ ကိုယ် သင်ရမယ့်စာကိုပဲ အာရုံစိုက် ပါတဲ့”

သားငယ်ရဲ့စကား အဆုံးမှာပဲ အခန်းထဲကို သူ့ အဖေ၀င်လာတယ်။ သူ့ပုံစံ က လန်းလန်းဆန်းဆန်း တက်တက်ကြွကြွပဲ။ ပြီး တော့ ကျွန်မတို့ကို လက်ကာ ပြတယ်။

“ဖေဖေ နိုးနေတာ နာရီ ၀က်လောက် ရှိပြီ။ သားတို့ ပြောနေတာ အဖေ ကြားပြီး ပါပြီ။ နားထောင်ရင်း စဉ်း စားပြီးပြီ

“ဖေဖေက သေရမှာ မကြောက်ပါဘူးကွာ။ ကမ္ဘာ ပျက်မှာကို ကြောက်တာပါ။ အ၀င်၊ အထွက် ပုံစံနဲ့ စနစ် တကျရှိနေတဲ့ လူ့လောကကြီး တစ်ခုလုံး လူသားမျိုးနွယ် တစ်ခုလုံး ပျက်စီးသွားမှာ၊ အနုပညာ အာရုံခံတတ်တဲ့ ဆန်းသစ်မှုတွေကို ဖန်တီး တတ်တဲ့ ဒေါသ၊ အဒေါသ၊ မောဟ၊ အမောဟ၊ လောဘ၊ အလောဘ၊ ပျော့ပျောင်းညင် သာမှု၊ ကြမ်းတမ်းခက်ထန်မှု၊ ချိုမြိန်မှု၊ ပျော့ညံ့မှု၊ ရဲရင့်မှု၊ ဆန့်ကျင်ဘက်တွေနဲ့ အရောင် လက်နေတဲ့ တို့ကမ္ဘာကြီး ပျောက်ဆုံးသွားမှာကို စိုးရိမ် တယ်။ အဲဒီခံစားချက်က ရှေ့ ရောက်နေတော့ ဒီကိစ္စနဲ့ ပတ် သက်တာတွေ ရေဆုံးရေဖျား လိုက်ရှာရင်း “မာယာ”တွေကို ယုံကြည်မိတော့တာပဲ။ အင်မတန် စနစ်ကျတဲ့၊ ယဉ် ကျေးမှုမြင့်မားတဲ့၊ နောက်ဆုံး ကွာ သူတို့တည်ဆောက်ခဲ့ပါ တယ်ဆိုတဲ့ မြို့ပျက်ကြီးတွေ ကို ကြည့်ပြီး ဖေဖေ အသက် မရှူဝံ့ဘူး။ ဟိုးလွန်ခဲ့တဲ့နှစ် ပေါင်းများစွာက ဒီလောက် ခေတ်မီအောင် တည်ဆောက် နိုင်ခဲ့တဲ့ အတတ်ပညာရှိတဲ့ မာယာလူမျိုးတွေကို ဖေဖေ လေးစား အထင်ကြီးမိတာနဲ့ အတူ ယုံကြည်မှုတွေ အခိုင် အမာတည်ဆောက်မိတယ်။ ဒါတကယ်ဖြစ်မှာလို့ တထစ် ချယုံခဲ့တယ်။

“နောက်ဆုံးတော့ ဖေ ဖေ ဆုံးဖြတ်ချက်ချလိုက် တယ်။ အခု နှစ်နှစ်ကျော် ကျော် လိုသေးတယ်။ အဲဒီ အချိန်မှာ ဖေဖေတို့မိသားစု လက်တွဲပြီး ခံစားကြမယ်။ ဖေဖေ ပိုင်ဆိုင်သမျှ ရောင်း ပြီး ကမ္ဘာလှည့်ခရီးသွားမယ်။ အကောင်းဆုံးတွေ စားမယ်။ အကောင်းဆုံး နေရာတွေကို ခရီးသွားမယ်”

“တကယ်လို့ ကမ္ဘာ မပျက်ခဲ့ရင် သားတို့ ခြေမဲ့ လက်မဲ့ဘ၀နဲ့ ဘ၀သစ် စကြမယ် ဆိုပါတော့”

“အေးပါ သားရယ်။ နှစ်လကျော် အိပ်မရဖြစ်ခဲ့ တာ။ မနေ့ညကတော့ သား တို့နှစ်ယောက်လုံး ဖေဖေ့ရင် ခွင်ထဲ ရောက်လာတာရော၊ အိပ်ဆေးသောက်ထားတာ ရောနဲ့ နှစ်နှစ်ခြိုက်ခြိုက် အိပ် ပျော်ပြီး ကြည်ကြည်လင်လင် နိုးလာခဲ့တယ်။သားငယ်လေးရဲ့ စကားတွေကို ဦးနှောက် ကြည်ကြည်၊ အမြင်ရှင်းရှင်း နားထောင်ပြီး စဉ်းစားခဲ့ပြီးပါ ပြီ။ ဖေဖေ မှားပါတယ်”

ကိုဘမောင်က ကျွန်မ ပခုံးကိုဖက် ရင်ခွင်ထဲဆွဲသွင်း ပြီး...

“သားတို့ မေမေကို ဖေဖေ မပြောပြရက်ဘူး။ ဖေဖေ ယောက်ျားတောင် ခံစားရတာ မေမေက မိန်းမ သားဆိုပြီး မပြောရက်ခဲ့တာ။ မေမေက ဖေဖေ့ကို လိုက် ကြည့်နေမှန်း သိပေမယ့် ဖေဖေ ပြောမထွက်ခဲ့ဘူး”

“အမလေး ကိုဘမောင် ရယ်...ကဲ...အခုကြည့်ပါဦး၊ သားငယ်လေး ကယ်ပေလို့၊ သားငယ်လေးကများ မာယာ ဆိုတာ အတွေးမပေါက်ရင် ဘယ့်နှယ်လုပ်မလဲ”

“ဒါကတော့ မေမေ ရယ်၊ မေမေကလည်း အိမ်ထဲက အိမ်ပြင်မထွက်၊ မျက်စိ ခွဲထားတော့ ဂျာနယ်တွေ၊ တီဗွီတွေ မကြည့်နိုင်၊ ၂၀၁၂ လိုကားမျိုး ကြည့်ကြမယ့် ပရိသတ်ကလည်း အိမ်မှာမရှိ။ ကိုကိုကလည်း တောထဲ ရောက်နေတာဆိုတော့ အလှမ်းဝေးနေကြလို့ပါ။ အခုတစ်လော ဒီသတင်းတွေ ပလူပျံနေတာ။ မြန်မာပြည်က ဂျာနယ်တွေထဲမှာလည်း ပါတယ်လေ။ သား အင်တာ နက်မှာ အမြဲဖတ်နေရတာ”

“ကဲပါကွာ၊ မေမေတို့ မြန်မာ့ယဉ်ကျေးမှုနဲ့ကြည့်ရင် ဒါအမင်္ဂလာကိစ္စပဲ။ မင်္ဂလာ မရှိတဲ့စကားကို မပြောရဘူး။ မတွေးရဘူး။ မကြံစည်ရ ဘူး။ မဆုံးဖြတ်ရဘူး။ ဗုဒ္ဓ တရားတော်နဲ့ကြည့်ရင် ပစ္စပ္ပုန်တည့်တည့်ရှုရမှာကိုး။ အဲဒီတော့ကွယ် ယဉ်ကျေးမှု ရှုထောင့်က ကြည့်ကြည့်၊ တရားတော်နဲ့ ကြည့်ကြည့်၊ သားဆရာ ပြောတဲ့ လက်ငင်း ဖြစ်နေတာ ဒါလည်း ပစ္စပ္ပုန် ပဲပေါ့၊ သားဆရာပြောတဲ့ ရှုထောင့်က ကြည့်ကြည့် ဘယ် လိုမှ မသင့်တာကို မတွေးဖို့ မကြံဖို့လိုတယ်။ ကျက်သရေ နဲ့ ပြည့်ဝနေတဲ့ မေမေတို့ မိသားစုမှာ နောက်ထပ် ဒါမျိုး ဘယ်တော့မှမဖြစ်စေရပါဘူး လို့ မေမေ့ကို ကတိပေးကြ၊ အဖေကြီးရော”

သားငယ်လေးက အရင်ဆုံး လက်ဆန့်တန်းပေး တော့ သားငယ်လေး လက် ပေါ်က သားကြီးလက်၊ ပြုံးစိစိနဲ့ မေးထိုးပြနေတဲ့ သားငယ် လေးရဲ့ ဖိတ်ခေါ်မှုနဲ့ ကျွန်မ လက်ကို သားကြီး လက်ပေါ် တင်လိုက်တယ်။ ကြည်နူးလို့ လား။ နောင်တတရားကြောင့် လား။ တုန်ခါနေတဲ့ သားအဖ ရဲ့ လက်တွေက ကျွန်မရဲ့ လက ပေါ်မှာ...။

အဖြူရောင်၊ရွှေ၊

(ရွှေအမြုတေ မဂ္ဂဇင်း၊ဧပြီလ ၂၀၁၁)